Sinopsis

Ortalizias tardanas ye una una bomba de parolas. Ye tamién una puerta de dople fuella que chira –s’ubre e se zarra– encaxata en una mesma curronera. Ye una nobela e ye un asayo de bez. U millor dito, ye un libro, eterochenio e total, que contién, por un costasto, un conchunto de cuatre biografías linguisticas parzials de cuatre filologos contemporanios que s’esparden en un carrazo de digresions sobre una catupla de diferens afers, e, por l’atro, una parella de decalogos: o primero trata d’o mestier u l’ofizio d’o recontador d’istorias e o segundo desembolica una mena de contrafeito d’os diez mandamientos d’a relichión cristiana.  Os cuatre filologos debanditos son, concretamén, Matteo Bartoli (o executor d’o erenzio de parolas de Tuone Udaina, o zaguer fablador d’o dalmata), Leonard Bloomfield (estudioso d’un amplo bentallo de luengas, entre as que feguran belunas d’as fablatas por os indios d’os feners norteamericanos), André Martinet (o masimo esponén, talmén, d’a escuela funzionalista) e Nikolái Marr (lingüista cheorchiano en o tiempo d’os sóbiez, empentador d’a teoría chafetica d’o luengache). Os cuatre s’aparexen entre suenias á o narrador d’a nobela que, igual como lo suyo autor, ye filologo e escritor. Ortalizias tardanas ye una obra, angluziosa e de grans dimensions, que achunta tanto relatos e narrazions como una serie de microasayos lingüisticos, literarios, istoricos e mitolochicos, asinas como un buen numbro d’elementos relazionatos con a poesía, a escritura, os libros de memorias, os articlos d’opinión e os cuadernos de biache.